Adjudikazio berrien ondoren eskola-jangelen funtzionamenduari buruz jasotako kexen harira, BIGEtik inkesta bat egin dugu egoera egiaztatzeko eta elkarteen informazioa biltzeko. Haien laguntzari esker, oso epe laburrean arazoen ikuspegi zabalagoa lortu dugu, eta Hezkuntza Sailari helarazi dizkiogu lortutako ondorioak.

Elikagaien kalitatea eta kantitate eskasak

Parte hartu duten elkarteen % 54k kalitate-arazoak adierazi ditu, eta % 50ek, kantitateak eskasak direla dio. Erantzunetan zapore txarreko janaria, testura eta prestaketa desegokiak, errazio txikiak eta ikasle guztientzat janari nahikorik ez dagoen egoerak aipatzen dira.

Menu-aldaketak, elikagai fresko gutxi, dieta bereziekin lotutako arazoak eta menu osatugabeak ere aipatzen dira. Iruzkinetan, gainera, menuen aniztasun falta eta plateren konbinazio desegokiak jaso dira, baita langile faltarekin eta zerbitzuaren antolaketarekin lotutako zailtasunak ere.

Ikasleekiko harremanetan eta familientzako komunikazioetan euskara erabiltzea eskatzen da. Gaztelania hutsean bidalitako menuak, itzulpen desegokiak, menuak bidaltzeko atzerapenak eta aldaketei buruzko informazio falta aipatzen dira.

Erantzunetan kezka ere agertzen da janaria bertan prestatzeko eredua adjudikatuta izan arren oraindik sukaldea martxan ez duten ikastetxeengatik, hala nola Bilbaoko Iruarteta eskola eta  Abadiñoko Traña-Matiena eskola. Jangela guztiek zerbitzua behar bezala emateko baliabide eta baldintza egokiak dituztela bermatu behar da.

Konponbideak eta jarraipena eskatzen ditugu

BIGEtik bildutako informazioa Hezkuntza Sailari helarazi diogu, eta gabeziak zuzentzeko neurriak eskatu ditugu. Kontratuak betetzen direla egiaztatzeko eta enpresei gorabeherei erantzun egokia ematea exijitzen dugu.

Elkarteek ere jakin behar dute zer egiten ari den arazoak konpontzeko. Horregatik, gorabeherak jakinarazteko, erregistratzeko eta haien jarraipena egiteko prozedura argia eskatzen dugu, baita jangela-batzordeei egindako jarduketen eta jasotako erantzunen berri ematea ere.

Jarraipen horretan, jangela batzordeek funtsezko eginkizuna dute, familien parte-hartzerako eta ikastetxearekin koordinatzeko guneak baitira. Garrantzitsua da aktibo egotea, zerbitzuaren funtzionamenduari buruzko informazioa izatea eta familien kezkak jasotzea, hobekuntza-proposamenak helarazi ahal izateko eta gorabeherak konpontzen diren egiaztatzeko.

Lanean jarraitzen dugu familien kexek hobekuntza zehatzak ekar ditzaten. Eskola-jangelak elikadura nahikoa eta kalitatezkoa, arreta egokia eta euskararen erabilera bermatu behar ditu.

Eskerrak ematen dizkiegu guraso-elkarteei parte hartzeagatik eta hain denbora laburrean informazioa biltzeko eta partekatzeko egindako ahaleginagatik. Haien lankidetza funtsezkoa da jantokien egoera ezagutzeko, familien eskaerak helarazteko eta hobekuntzak eskatzeko.