Gaur goizean prentsaurrea eman dugu Euskal Eskola Publikoaz Harro Topagunea osatzen dugun plataforma eta erakundeek. Bertan, EAEko hezkuntza-sistema birplanteatzeko garaia dela aldarrikatu dugu, segregazioa birproduzitzen duelako eta ez dituelako betetzen euskal gizarteak eskatzen eta behar dituen inklusio helburuak.

Lau helburu ditu Euskal Eskola Publikoaz Harro Topaguneak:

1. Euskal Eskola Publikoaren balioa azpimarratu eta euskal gizarteak berarekiko duen atxikimendua handitzea. Euskal eskola publikoa hezkuntza sistemaren ardatzean jarriz, bere alde borrokatu eta bere printzipioak lau haizetara zabaltzea.

2.- Eskola Publikoak behar dituen baliabideak bermatzea eta tokian tokiko oztopo eta diskriminazioak salatzea.

3.- Hezkuntza sistemaren pribatizazioaren aurka egitea, gaur egungo sistema duala eta sistema horren atzean dauden kontzertuak salatuz.  Pribatizazio dinamika eteteko Eusko Jaurlaritzak ikastetxeen publifikazioa ahalbideratuko lukeen araudia sortzea aldarrikatzea.

4.- EAErako balizko Hezkuntza Legearen inguruko hausnarketa eta eztabaida zabaltzea ikuspuntu jantzi eta kritiko batetik eztabaidatu ahal izateko.

EAEko hezkuntzari buruzko datu batzuk eman ditugu:

– Europa mailan, sare pribatu gehien duen hirugarren lurraldea gara.

-Maila sozio-ekonomiko baxuena duten ikasleak sare publikoan daude.

-Jantokiko beken kopurua ia hirukoitza da sare publikoan.

-Atzerriko ikasleen %67 sare publikoan eskolaratzen da, %33 itundu-pribatuan.

-Hezkuntza premia bereziak dituzten ikasleen %63 sare publikoan dago eta %37 itunpeko-pribatuan.

-Hezkuntza-itunen araudiaren baldintzak ez dira betetzen EAEn.

Datu hauek erakusten dute nolakoa den EAEko hezkuntza sistema duala: desorekatua, diskriminatzailea eta segregatzailea. Beraz, gizarte kohesionatu, justu eta inklusibo bat lortzeko, ezinbestekoa da egungo hezkuntza-sistema birplanteatzea.

Irakurri prentsa-oharra hemen.

**Euskal Eskola Publikoaz Harroren kamisetak salgai sindikatuen hiriburuetako egoitzetan