Larunbatean jai bat egin zen Larraulgo Herri Eskolaren inaugurazioa ospatzeko. Asteasuko ikasgela desplazatu gisa 14 urtez jardun ondoren, azkenean haur eta lehen hezkuntzako eskola publiko bihurtu dira.

Eskolako kideez gain, ikasle eta familia ohiak ere izan ziren ospakizunean parte hartzen, gaur egungo familiekin, irakasleekin eta ikasleekin batera.

Hezkuntza Departamentuko, Larraulgo Udaleko eta Baikarako zein EHIGEko ordezkariak ere izan ziren, Eskola Txikien koordinatzailearekin batera.

Ikastetxeko zelaian landare sendagarrien gurpil bat landatu zen ekimen sinboliko gisa. Hilabeteko sendabelar bat, urtaroak eta zikloa osatuz. Urtaro bakoitzean, eskolari eusten dion eragile bat izan zen protagonista: familiak udazkenean, erakundeak neguan, ikasleak udaberrian eta irakasleak udan.

‘Udazkena, ekimena’: Larraulgo eskola-zerbitzua 2008an martxan jarri zuen gurasoetako batek, Eider Arozenak, udazkeneko sendabelar bat landatu zuen: txilarra (urria), erromeroa (azaroa) eta ilena (abendua).

‘Negua, enpatia’: Maite Arana Larraulgo alkateak neguko sendabelarren ardura izan zuen: malba (urtarrila), garraixka edo melisa (otsaila) eta pixa-belarra (martxoa). Une horretan, Gipuzkoako Hezkuntzako Lurralde ordezkariak, Amaia Urzelaik, ikaskuntzak aurrera egin duela pixkanaka baina arrakastaz eta Larraulgo herriaren ametsa bete dela nabarmendu zuen,.

‘Udaberria, bizipoza’: Eneko Esnal ikasle ohiak landatu zituen udaberriko sendabelarrak: mendabeltza (apirila), izpiliku fina edo labanda (maiatza) eta mendaroa edo oreganoa (ekaina).

‘Uda, oparotasuna’: Josune Eizmendi eta Maikar Iurramendi Larraulgo eskolako irakasle eta irakasleak udako sendabelarrak landatu zituzten: mihilua edo hinojoa (uztaila), ezkaia edo tomilloa (abuztua) eta salbia (iraila). Koldo Rabadán Larraulgo Herri Eskolako irakasle eta lehengo zuzendariak, “badirudi klaustroan atzo izan zela gure ametsetako eskolaz hitz egiten ari ginena. Eta ia ametsetako eskola jo dugu, baina oinez jarraitu behar dugu”.

Ekitaldiaren amaieran, han zeuden guztiek sendabelarrari ura bota ahal izan zioten.