Eusko Jaurlaritzaren gomendioak jarraituz, atzeratu egingo ditugu martxoaren 11 eta 12an Bilbon ospatzekoak ziren Eskola Digitala jardunaldiak. Aurrerago jakinaraziko dugu data berria.

Eskola Digitalaren 6. Topaketak hiru lerro nagusi landuko ditu aurten: euskara, inklusioa eta teknologien erabilera segurua.

Aurreko edizioetan bezala hainbat motatako edukiak izango ditugu espazio desberdinetan banatuta: ikastetxeen esperientziak, adituen hitzaldiak, enpresen aurkezpenak eta tailerrak.

Martxoaren 11ean euskarazko edukiak izango ditugu hizpide, Miren Dobaran Hizkuntza Politikarako sailburuordeak Hizkuntza Teknologien planaren oinarriak azalduko bait dizkigu. Martxoaren 12an cyberbulling-aen txanda izango da Maite Garaigordobil EHUko ikerlariaren eskutik. Egun berean, inklusio digitala izango dugu hizpide Gasteizko Koldo Mitxelena BHI, Portugaleteko Ruperto Medina eskola eta Zarautzko Lizardi institutuaren eskutik.

Gainera, beste ikastetxe publiko hauen digitalizazio-esperientziak ezagutzeko aukera izango dugu ere: Orokieta LHI (Zarautz), Karmengo Ama (IPI), Tiboli eskola (Bilbo) eta San Adrian BHI (Bilbo).

Beste arlo hauek ere presentzia izango dute seigarren topaketa hauetan: Wikipedia hezkuntzan erabiltzeko proposamenak (Euskal Wikilarien Kultura Elkartearen eskutik) eta inteligentzia artifiziala eta datuen zientzia (Nafarroako Unibertsitate Publikoko Humberto Bustince irakasle katedradunaren eskutik). EHUko beste bi aditu ere izango ditugu gurekin: jolasmatika proiektua azalduko digu Edurne Larrazak eta STEM irakaskuntzari buruzko Newton plataforma azalduko du Eva Ibarrolak.

Aurreko edizioetan bezala, enpresen azken nobedadeak eta hezkuntzarako proposamenak ezagutzeko aukera izango dugu, bai hitzaldien bidez eta baita stand-etan ere.

Izena ematean gogoratu 2 egun eta 3 espazio izango ditugula aldi berean: Euskaltel aretoa, Zubia aretoa eta tailerrak.

Ikusi hemen egitarau osoa: https://eskoladigitala.eus/egitaraua/

Deskargatu egitaraua PDF formatuan

Animatu eta izena eman hemen: https://eskoladigitala.eus/izena-eman/