Bige archivos - Ehige

Batuz eta IGEak: Zer da eta nola eragiten digu? Informazio-saioko laburpena

Bige — Fri, 10 Apr 2026 11:40:53 +0000

Pasa den martxoaren 26an, BIGEk saio bat antolatu zuen Bizkaiko Foru Aldundiko teknikariekin, gure elkarteetan Batuz sistema nola ezarriko den azaltzeko. Badakigu termino hauek korapilatsuak eman dezaketela; horregatik, familia guztientzat modu errazean azaldu nahi ditugu.

Zertaz ari gara?

Araudia ulertzeko, funtsezko hiru kontzeptu argitu behar ditugu:

BATUZ: Bizkaiko Ogasunaren estrategia orokorra da, enpresa eta erakunde guztiek (IGEak barne) euren sarrerak modu digitalean aitor ditzaten.
TicketBAI: Sistema honen bidez, obligazioa dagoen kasuetan, QR kode bat jartzen da fakturetan, aldatu edo ezabatu ezin daitezen.
EAEK (Ekonomia Jardueren Erregistro Liburua): Liburu digital bat da, Ogasunaren webgunean. Bertan, elkarteok gure jaulkitako eta jasotako fakturak idatzi behar ditugu (salbuespenak salbuespen).

Nola funtzionatuko du EAEK-k gure IGEentzat?

Gure fakturak idatziko ditugun liburu digitala da. Arau orokor gisa, hiruhilean behin egingo da.

SARRERAK (IGEak jasotzen duena)

Ez da ezer egin behar (TicketBAI eta EAEK gabe) kasu hauetan: Loteria, bazkideen kuotak kobratzea, dirulaguntzak, dohaintzak eta BEZik gabeko zenbait jarduera (hala nola prestakuntza-tailerrak, eskolaz kanpoko kirol-jarduerak edo txangoak).
- Salbuespena: Familia batek urtean 1.000 €baino gehiago ordaintzen badio IGEari, urtean ohar bakarra egin beharko da, familia berari egindako faktura guztiak batuta (hurrengo urteko urtarrilean). Ordaintzen duen pertsonaren NANa eta zenbateko osoa adieraziko dira.
Beste eragiketa batzuk (kamiseten salmenta, txosnak, etab.). Jarduera horiek BEZa daramate eta, printzipioz, TicketBAI erabiltzera behartzen dute.

Jarduera horietarako salbuespen berezi bat dago noizbehinkakoak direnean (ez egin TicketBAI eta EELn egunero laburpen bat baino ez duzu erregistratzen, apunte guztiak egin beharrean). Libratze hori gerta dadin, honako hau bete behar da:

- - Jarduerak urtean 15 egun baino gutxiago irautea.
  - jarduera horrengatiko diru-sarrerak 50.000 €-tik beherakoak izatea urtean
  - onurak elkartearen jardueretara bideratzea.

GASTUAK (IGEak ordaintzen duena)

Ez dira EAEK-n idazten: Nominen ordainketak, aseguruak, finantza-gastuak, BEZik gabeko fakturak adingabeen babesarekin lotutako jarduerenak, IGEaren daturik agertzen ez den erosketa-txartelak (ticketak), eta hornidura-fakturak IGEak BEZa deduzitzen ez badu (telefonoa, ura, argia…).
EAEK-n idazten dira: Gainontzeko faktura guztiak.
- Garrantzitsua: Hornitzaile berari urtean 1.000 € baino gehiago ordaintzen badiogu, urtean behin idatzi beharko da hornitzaile horri egindako faktura guztien batura (hurrengo urteko urtarrilean), “zerga-garrantzia duen informazioa” atalean. Hornitzailearen NANa eta zenbateko osoa adieraziko dira.

Tresnak

Ogasunak doako tresnak eskaintzen ditu, hala nola “Egin Zure Faktura” aplikazioa eta EAEK-rako sarbidea bere webgunearen bidez (www.batuz.eus). Horiek erabiltzeko, elkartearen ziurtagiri elektronikoa beharko dugu.

Zalantzak dituzu? BIGEn badakigu honek kezkak sor ditzakeela zuzendaritza-batzordeetan. Horregatik, edozein zalantza guri zuzenean helaraztera animatzen zaituztegu, prozesu honetan lagundu ahal izateko: bige@bige.eus

Guraso Elkarte guztiei informazioa ematen eta laguntzen jarraituko dugu, izapide horiek benetan axola zaienetik denborarik ken ez diezaguten: gure seme-alaben eskolan parte hartzea.

Bizkaiko Foru Ogasunaren aurkezpen osoa esteka honetan kontsulta dezakezu: [BATUZ-IGE Aurkezpena PDF]

La entrada Batuz eta IGEak: Zer da eta nola eragiten digu? Informazio-saioko laburpena se publicó primero en Ehige.

Basauriko eskola publikoko IGEek kalitate handiagoko jantoki baten alde lanean dihardute

Bige — Thu, 09 Apr 2026 08:00:24 +0000

Joan den martxoaren 4an, Basauriko eskola publikoetako guraso-elkarteen ordezkariek bilera ireki bat deitu zuten beren ikastetxeetako familientzat, eskola-jantokien egoera aztertzeko.

Topaketaren helburua zen, alde batetik, aditzera ematea bost urte baino gehiago daramatzatela lanean jantoki-zerbitzuan hobekuntzak lortzeko, eta orain arte ez dela aurrerapen esanguratsurik egin. «Hobera egin beharrean, egoerak okerrera egin du», adierazi zuten. Bestalde, beren lanarekin jarraitzeko babesa lortu nahi zuten, baita familien kexak eta ekarpenak jaso ere.

Saioan zehar, IGEek 2021etik aurrera egindako ekintzen errepasoa egin zuten, besteak beste: komunikatuen zabalkundea, Eurest catering enpresarekin izandako bilerak – emaitza eskasekotzat joak-, Udalarekin egindako topaketak, udal osoko bilkuretara joatea, Eusko Jaurlaritzarekin egindako hainbat bilera eta jantoki-batzordeetan egindako etengabeko lana.

Gaur egun, familiak Eusko Jaurlaritzarekin bi bilera egiteko zain daude: bata Bizkaiko ordezkariarekin sukalde bertikalen proiektuari ekiteko, eta bestea Lakuako Administrazio eta Hezkuntza Zerbitzuen sailburuordearekin. Bilera horietan kontratazio-agiriak hobetzeko proposamenak helarazi nahi dituzte. Bi bilerak urtarrilean egitekoak ziren, baina oraindik ez dituzte deitu.

Halaber, proiektu honetan nola parte hartu azaldu zen, IGEen, Eskolako kontseiluen eta jantoki-batzordeen funtzionamendua argituz, eta familien ahalik eta babes handiena lortzeko beharra azpimarratuz, bide desberdinen bidez.

Aztertutako alderdirik kritikoenetako bat menuen kalitatea izan zen. Salatu zutenez, ez dira produktu freskoak erabiltzen, eta kontserbak zein ultrizoztuak nagusitzen dira, aniztasun gutxirekin. Era berean, ohikoa dela elikagai prozesatu eta ultraprozesatuak erabiltzea adierazi zuten, etxeko elaboraziorik ez egotea – adibidez, saltsak edo saldak – eta plateren errepikapena, eta horrek «menu monotono eta gutxi elikagarriak» sortzen dituela.

Horrez gain, zerbitzuan hainbat gorabehera aipatu zituzten: babes-menuen falta, elaborazioetan akatsak, razioi eskasak, elikagai batzuen kalitate arazoak eta janaria banatzeko atzerapenak, azken egoeran eragina dutenak. Halaber, langileen bajak ez estaltzea eta ikasle kopuru handiegia monitore bakoitzeko salatu zituzten. Gainera, kasu askotan, jantokietako arduradunek behar adinako prestakuntza eta denbora ez dituztela adierazi zuten, beren lana behar bezala egiteko.

Familiek zerbitzuaren enpresa adjudikaziodunarekin duten desadostasuna agertu zuten, eta hobekuntzak eskatzeko mobilizatzen jarraitzeko asmoa adierazi zuten. Aurreikusitako ekintzen artean daude sinadura-bilketak, erreklamazio formalak, idatzi ofizialak eta balizko kontzentrazioak.

Lehen antolaketa-urrats gisa, WhatsAppeko komunitate bat sortu da familiak koordinatzeko eta etorkizuneko ekimenak planifikatzeko. Helburua, azpimarratu dutenez, gaur egungo eskola-jantokien eredua aldatzea da, zeinaren «eraginkortasun eza agerian geratu den».

BIDEOA

La entrada Basauriko eskola publikoko IGEek kalitate handiagoko jantoki baten alde lanean dihardute se publicó primero en Ehige.

Txurdinaga Behekoa BHIko eta Larrañazubi HLHIko hezkuntza-komunitateek elkarrizketa falta salatzen dute hezkuntza-eskaintzako aldaketen aurrean

Bige — Tue, 24 Mar 2026 12:03:55 +0000

Bilboko IES Txurdinaga Behekoa institutuko eta Getxoko CEIP Larrañazubi eskolako hezkuntza-komunitateek Hezkuntza Sailak hezkuntza-eskaintza aldatzearen erabakiaren aurrean euren ahotsa altxatu dute, Eusko Jaurlaritzan dagoen kontraesan kezkagarria agerian utziz. Begoña Pedrosa sailburuak publikoki behin eta berriz adierazten duen arren Euskal Eskola Publikoa sistemaren “ardatz nagusia” eta lehentasun gorena dela, bi zentro hauetan gertatzen ari dena kontrakoa erakusten dute: murrizketen eta elkarrizketa faltaren estrategia bat, hain zuzen ere ardatz hori ahultzen duena.

Bi zentroetako hezkuntza-komunitateek euren etorkizunean zuzenean eragiten duten azken erabakien inguruko kezka adierazi dute. Familiak, ikasleak eta hezkuntza-ordezkariak elkarrizketa eta gardentasuna eskatzen ari dira, haien ustez hezkuntza-eskaintza publikoan ondorio larriak izan ditzaketen aldaketak ezarri aurretik.

Txurdinaga Behekoa: eskaintza publiko gutxiago eremuan

Bilboko IES Txurdinaga Behekoa institutuko hezkuntza-komunitateak —ikasleak, familiak eta irakasleak— Hezkuntza Sailak hartutako erabakiaren aurkako jarrera agertu du: 2027-2028 ikasturtetik aurrera Arte Batxilergoko 1. maila (bi modalitateetan) eta Diseinuko goi-mailako zikloa kentzea, gaur egun zentroan ematen direnak. Erabaki honek talka egiten du eskola publikoa sare “erreferente eta erakargarri” bihurtzeko erakundeek egindako promesarekin. “Euskal Eskola Publikoarekiko gure konpromisoa erabatekoa da”, adierazi zuen duela gutxi Begoña Pedrosak.

Irakaskuntza horiek kentzeak arte-ikasketekin lotutako eskaintza publikoa ahultzea ekarriko luke, eta Batxilergoko zein Lanbide Heziketako eskaintza nabarmen murriztea. Erabaki honek zuzenean eragiten, bereziki Bilboko 4. barrutiari (Begoña, Santutxu, Txurdinaga eta Otxarkoaga), baina baita Bilbo osoari eta inguruko herriei ere.

Salatzen dutenez, neurria elkarrizketarik gabe hartu da, eta zentroari ez zaio baimendu ate irekien jardunaldiak egitea ere. Testuinguru honetan, hezkuntza-komunitateak galdera nagusi bat planteatzen du: nola izan daiteke Euskal Eskola Publikoa “lehena” baldin eta bere eskaintza familiei erakustea eragozten bazaio, sare itunduak hedatzen jarraitzen duen bitartean? Irakaskuntza hauek murriztean, Sailak ez du soilik zentroaren espazio-gaitasuna baztertzen, baizik eta ikasleak eskaintza pribatura bultzatzen ditu, Euskal Eskola Publikoa indartzeko diskurtsoa bera traizionatuz.

Institutuak egungo eskaintza mantentzearen alde egiten du, bereziki Arte Batxilergoa bi modalitateetan —Arte plastikoak, irudia eta diseinua, eta Musika eta arte eszenikoak— eta A eta D hizkuntza-ereduetan, baita Diseinuko zikloa ere, ikasketa horiekin lotuta dagoena eta sarbide-probarik egin gabe onartua izateko aukera ematen duena. Gainera, zentroak espazio nahikoa duela azpimarratzen dute, eskaintza hori mantentzeko edo handitzeko ere, eta hori Euskal Eskola Publikoaren aldeko apustu argia litzateke sare itunduaren hazkundearen aurrean.

Egoera honen aurrean, hezkuntza-komunitateak neurria atzera botatzea, elkarrizketa-prozesu bat irekitzea eta hezkuntza-plangintza gardena eskatzen du, Batxilergoaren eta Diseinuko zikloaren jarraipena bermatzeko. Bien bitartean, ikasleek, familiek eta irakasleek mobilizatzen jarraituko dutela iragarri dute, eskola publikoa eta institutuko hezkuntza-etorkizuna defendatzeko.

Larrañazubi: adostasunik gabeko itxiera

Getxoko CEIP Larrañazubi eskolaren kasuan, Familien Elkarteak (IGE) martxoaren 11n bilera izan zuen Hezkuntza Saileko ordezkariekin, zentroa ixteko planteatutako prozesua aztertzeko. Bileran Getxoko alkatea, udal ordezkariak eta Aniztasun eta Hezkuntza Inklusio Saileko arduradunak ere izan ziren.

Bileran, familiek euren kezka adierazi zuten eta erabakia berrikusteko eskatu zuten, irizpide pedagogikoak, antolakuntzakoak eta sozialak kontuan hartuta. IGEren arabera, Administrazioak ez zuen itxiera justifikatzen duen txosten tekniko edo pedagogikorik aurkeztu.

Planteatutako gaien artean, familiek ikastetxeko Gela Egonkorraren jarraitutasuna nabarmendu zuten, egungo inguruneak hezkuntza-premia bereziak dituzten ikasleengan duen eragin positiboa azpimarratuz, baita inguruko Gela Egonkorra duen ikastetxe bakarra dela ere asierazi zuten.

Bilera akordiorik gabe amaitu zen. Ondoren, familiek iragarri zuten zentroaren hezkuntza-proiektuaren jarraipena defendatzen jarraituko dutela. Egoera Arartekoari eta Herriaren Defendatzaileari ere helarazi diete, eta elkarrizketa-gune bat irekitzea eskatu dute, zentroaren etorkizuna bermatuko duten alternatibak aztertzeko eta Getxoko eskola publikoa indartzeko.

Itxiera-neurria ez da eztabaidatu ezta hezkuntza-komunitatearen parte-hartzearekin ere egin, eta erabakia familien, eskola-kontseiluaren, irakasleen klaustroaren eta baita Getxoko Udalaren aurkako jarrerarekin hartu da; izan ere, Udalak gehiengo osoz onartutako mozio baten bidez bere desadostasuna adierazi du.

Benetako elkarrizketaren beharra

BIGEk berriro azpimarratzen du hezkuntza-komunitateekin benetako elkarrizketa-guneak irekitzeko beharra eta hezkuntza-plangintzan gardentasuna bermatzearen garrantzia. Ildo horretan, federazioak hainbat aldiz eskatu du Bizkaiko lurralde-ordezkariarekin bilera bat egitea gai hauek lantzeko, baina oraingoz ez du erantzunik jaso; horrek agerian uzten du jarduteko modu aldebakartza, eskola publikoa ahultzen duena.

Txurdinaga Behekoa eta Larrañazubiko egoerek zalantzan jartzen dute diskurtso instituzionalaren eta hartutako erabakien arteko koherentzia. Sare publikoa indartu beharrean, neurri hauek atzerapauso bat dira bere garapenean eta ikasleen beharrei erantzuteko gaitasunean.

BIGEn Euskal Eskola Publiko sendo, inklusibo eta kalitatezko baten alde egiten dugu, familien, ikasleen eta irakasleen parte-hartze aktiboarekin eraikia, eta lanean eta mobilizatzen jarraituko dugula ohartarazten dugu haren etorkizuna bermatzeko.

La entrada Txurdinaga Behekoa BHIko eta Larrañazubi HLHIko hezkuntza-komunitateek elkarrizketa falta salatzen dute hezkuntza-eskaintzako aldaketen aurrean se publicó primero en Ehige.

Bilboko Kontxa Eskola: Zentzumenen bidezko inklusioa errealitate bihurtuz

Bige — Wed, 18 Mar 2026 11:02:35 +0000

Snoezelen gela sortzeko ideia 24/25. ikasturtean mamitu zen Haur Hezkuntzan. Helburua argia zen: ikasleek zentzumenak estimulatzeko, emozioak erregulatzeko eta ikasle bakoitzaren beharrei erantzuteko espazio zehatza izatea. Eraldatzen programak eskainitako laguntzei esker, proiektuak beharrezko bultzada jaso du aurrera egiteko.

Gela ISNA (International Snoezelen Association) elkarteak ezartzen dituen jarraibideen arabera diseinatu da. Argi-proiekzioak, ehundura desberdinak eta soinu lasaigarriak uztartuz, ikasle bakoitzaren erritmoa eta beharrak errespetatzen dituen babeslekua bihurtu da. Proposamen sentsorialak gaien arabera antolatzen dira, ikasleei errealitate sentsorial anitzak eskainiz: udaberriko koloreak, udazkeneko hostoen hotsa, itsaspeko lasaitasuna edo eguzki-sistemaren misterioak esplora ditzakete bertan.

Gune hau ez da gela soil bat; tresna pedagogiko bizia da, arreta pertsonalizatua eta talde-lana uztartzen dituena. Saioak banaka zein talde txikietan (4-5 ume) egiten dira, interakzio egokia eta giro lasaia bermatzeko.

Gaur egun, erabilera Haur Hezkuntzako eta Hezkuntza Premia Bereziak (HPB) dituzten ikasleei zuzenduta dago batez ere. Hala ere, ikastetxearen begirada haratago doa: etorkizun hurbilean Lehen Hezkuntzako taldeek zein Gela Egonkorreko ikasleek ere gunea erabiltzeko aukera izatea aurreikusten da, baliabide hau eskola osoko inklusio-tresna bihurtuz.

Espazio fisikoa egokitzea bezain garrantzitsua izan da irakasle-taldearen formakuntza. Ikasturte honetako lehen hiruhilekoan, bi irakasle erreferentek jaso dute prestakuntza espezializatua: Ianire Cantero (Haur Hezkuntza) eta Enara Martin (Hezkuntza Berezia). Biek gela atondu eta hura erabiltzeko jardun-gida zehatz bat garatu dute gainontzeko profesionalentzat.

Berrikuntza honek jarraipena izango du, azken hiruhilekoan prestakuntza saio berriak antolatuko baitira klaustroko kideentzat, Snoezelen metodologian sakondu eta gela honen potentzial guztia eskolako egunerokoan txertatzeko. Bilboko Kontxa eskolak erakutsi du, baliabide egokiekin eta irakasle-talde konprometitu batekin, eskola publikoa inklusioaren abangoardian dagoela, ikasle bakoitzaren beharrei erantzun kualifikatua eta gizatiarra emanez.

+info: Kontxa eskola

La entrada Bilboko Kontxa Eskola: Zentzumenen bidezko inklusioa errealitate bihurtuz se publicó primero en Ehige.

KIROLAON: Bizkaiko eskola-kirolean indarkeria prebenitu eta salatzeko konfidentzialtasunezko kanala

Bige — Thu, 05 Mar 2026 12:00:16 +0000

KIROLAON tresna hurbil eta eskuragarria izan nahi du, kirolaren esparruan egoera zail baten aurrean inor bakarrik edo babesik gabe senti ez dadin.

KIROLAON Bizkaiko kirolaren inguruan dauden pertsonak zaintzeko sortutako konfidentzialtasunezko kanala da, bereziki adingabeko kirolariei zuzendua. Kirolariez gain, entrenatzaileei, familiei eta kirol ingurunean parte hartzen duen edonori ere zuzentzen zaie.

Espazio seguru bat da, non zalantzak, kezkak edo indarkeria-egoerak salatu daitezkeen. Baina ez du balio soilik dagoeneko gertatu diren egoeretarako; etorkizunean indarkeria bihur daitezkeen arrisku-egoerak garaiz antzemateko ere balio du, garaiz esku hartu ahal izateko.

Funtzionamendua oso erraza da. www.kirolaon.eus webgunean sartu eta inprimaki labur bat betetzea besterik ez dago. Handik aurrera, arlo horretan adituak diren profesionalen talde batek azkar eta konfidentzialtasunez erantzungo du, jarraitu beharreko urratsak eta egoera bakoitzaren ondorio posibleak azalduz.

La entrada KIROLAON: Bizkaiko eskola-kirolean indarkeria prebenitu eta salatzeko konfidentzialtasunezko kanala se publicó primero en Ehige.

Jarduera fisikoaren eta kirolaren profesionalen erregistroa

Bige — Tue, 24 Feb 2026 09:54:33 +0000

2026ko urtarrilaren 1etik aurrera, kirolaren arloan jarduten duten monitoreek Jarduera Fisikoaren eta Kirolaren Profesionalen Euskal Autonomia Erkidegoko Erregistroan inskribatuta egon beharko dute.

Inskripzioa nahitaezkoa da lanbidean jardun ahal izateko, ekainaren 30eko 8/2022 Legearen arabera.

Helburua da kirol-zerbitzuen segurtasuna, kalitatea eta gardentasuna hobetzea.

Erregistroa errolda ofizial bat da. Entrenatzaileek, monitoreek eta teknikariek jarduteko beharrezkoa den prestakuntza eta egiaztapena dutela bermatzen du, ordainsaria jasota zein boluntario gisa aritu.

Era berean, profesionalek eskatutako titulazio ofiziala eta indarrean dagoen erantzukizun zibileko asegurua dutela bermatzen du, erabiltzaileen osasuna eta segurtasuna babesteko.

Edozein pertsonak kontsulta dezake Erregistroa, lan horretan ari den kirol arloko langileen gaitasuna egiaztatzeko.

Inskripzioa modu telematikoan egiten da, Kirol Eskolaren plataformaren bidez, erantzukizunpeko adierazpen baten bitartez.

Dagokion titulazioaz gain, nahitaezkoa da lehen sorospenetako prestakuntza eguneratua egiaztatzea presentzia fisikoa duten lanbide guztietan.

Informazio guztia erantsitako bideoan eta estekan kontsulta daiteke.

BILATZAILEA ERREGISTROAN

La entrada Jarduera fisikoaren eta kirolaren profesionalen erregistroa se publicó primero en Ehige.

Portugaleteko Antonio Trueba ikastetxeak Bizkaiko lehenengo snoezelen gela publikoa ireki du

Bige — Wed, 18 Feb 2026 11:34:04 +0000

Portugaleteko Antonio Trueba ikastetxeak Bizkaiko lehenengo snoezelen gela publikoa ireki du, eta erreferente bihurtu da eskola publikoan inklusioan eta ongizate emozionalean.

Snoezelen gela edo gela multisentsoriala, zentzumenak modu kontrolatuan estimulatzeko bereziki diseinatutako espazioa da. Argiak, koloreak, soinuak, testurak eta usainak uztartzen ditu, guztiz erregulagarria den ingurune batean; normalean zuria izaten da, eta argi-intentsitatea zein giroa egokitzeko aukera ematen du. Helburua erabiltzailearen beharren arabera esperientzia lasaigarriak edo aktibatzaileak sortzea da. Horrelako gelak emozioen autoerregulazioa, arreta, komunikazioa eta garapen kognitiboa sustatzeko erabiltzen dira, bereziki hezkuntza- edo emozio-behar espezifikoak dituzten ikasleen kasuan.

35 metro koadroko espazio berria Haur Hezkuntzako eraikinean dago, eta hiru ikuspegitatik lan egiteko aukera ematen du: ikuspegi librea, pedagogikoa eta terapeutikoa. Horrela, esku-hartze espezializaturako tresna izateaz gain, ikastetxe osorako hezkuntza-baliabide ere bada.

Proiektu honetan funtsezko zeregina izan du ikastetxeko Guraso Elkarteak, gelaren finantzaketa bere gain hartu baitu, eskola komunitateko haur eta gazteen ongizate emozionala hobetzeko halako baliabide bat izatearen garrantziaz jabetuta. Elkarteak baloratu zuen eskola publikoan laguntza espezifikoen beharra gero eta handiagoa dela, eta komunitate osoan eragina duen ekimen baten aldeko apustu irmoa egin zuen.

Abian jartzeko, irakasle batzuk prestakuntza espezifikoa egin behar izan dute azken urtean. Ikasketa-buru Zahara Urquiza eta Alazne Molinuevo aholkulariak prestakuntza espezializatua jaso dute gela behar bezala kudeatu ahal izateko; izan ere, espazio mota hauek ezagutza teknikoak eskatzen dituzte zentzumen-estimulazioan, ingurune-erregulazioan eta laguntza terapeutikoan. Prestakuntza hori funtsezkoa izan da ekipamenduaren erabilera egokia eta segurua bermatzeko.

Gainera, aukera zabaldu da beste ikastetxe publiko eta hezkuntza-profesional batzuek gela bisitatu ahal izateko, haren funtzionamendua ezagutzeko eta esperientzia partekatzeko, horrelako baliabideak beste eskola publiko batzuetara ere hedatzea sustatzeko asmoz.

La entrada Portugaleteko Antonio Trueba ikastetxeak Bizkaiko lehenengo snoezelen gela publikoa ireki du se publicó primero en Ehige.

Zornotzatik Bermeora bitarteko bederatzi herrik osatutako ‘Danon Eskola Publikoa’ sarea jaio da

Bige — Wed, 04 Feb 2026 10:16:35 +0000

Zornotzatik Bermeora bitarteko bederatzi herrik, 25 eskolak eta 13 guraso elkartek bat egin dute Danon Eskola Publikoa sarea sortzeko eta hezkuntza publikoa indartzeko xedez. Eskualdeko hezkuntza-komunitatearen historian abiapuntu bat da saretzea hau.

Busturiko Ekoetxean aurkeztu zuten sarea, larunbatean “babes zabal eta instituzionala” izan zuen ekitaldian. Bertan egon ziren, besteak beste, guraso elkarteen ordezkariak, bederatzi udaletako udal ordezkariak eta eskualdeko hezkuntza ordezkariak izan ziren aurkezpenean. Zornotza, Muxika, Gernika-Lumo, Arratzu, Gautegiz Arteaga, Natxitua, Busturia, Mundaka eta Bermeoko eskola eta ikastetxe publikoak dira sarekideak. “Haur eskoletatik hasi eta institutuetarainoko zentroak izango dira horren parte, Lanbide Heziketa, EPA eta musika eskolak barne”.

Proiektua guraso elkarte desberdinen lankidetzatik jaio dela nabarmendu dute: “Gurasoen borondatetik, ilusioetatik eta konpromiso solidariotik jaio da saretzea”. Publikoaz harro daude, eta harrotasun hori lau haizetara ikusarazi eta zabaldu nahi dutela adierazi dute. Sarea bost baloretan oinarritzen dela zehaztu dute: Inklusioa eta aukera berdintasuna, ekitatea eta justizia soziala, kalitatezko hezkuntza profesionala, demokrazia eta parte-hartzea, eta azkenik, euskalduna eta gertukoa.

Proiektuak “nortasun kolektibo bat” ematen diotela diote; bakoitzaren berezitasunetik abiatuta, talde bat izatearen babesa, hain zuzen. “Eskola bakoitza bere bidetik ibili beharrean, denok proiektu handiago baten parte garela sentitu nahi dugu, eta saretze honek babesa eta indar kolektiboa ematen digu guri, zein familiei”.

Marka propioa eta irudi berria sortuko dute Danon Eskola Publikoa sarea sortzearekin batera, “komunitatearen aniztasuna eta batasuna ordezkatzeko” helburuari eutsiz, eta esperantzadun mezua ere zabaldu dute, beregain: “Batera indartsuagoak garelako, eskola publikoa elkarlanean saretzen dugu. Gure eskolak saretuz, ez dugu soilik hezkuntza babesten; gure herrien etorkizuna eta arnasa ehuntzen ari gara”.

La entrada Zornotzatik Bermeora bitarteko bederatzi herrik osatutako ‘Danon Eskola Publikoa’ sarea jaio da se publicó primero en Ehige.

Eskola mapa berrantolatzea aurrera doa, gardentasunik eta parte-hartzerik gabe

Bige — Mon, 02 Feb 2026 12:01:31 +0000

Urte asko igaro dira Euskal Eskola Publikoaren eskola-mapari buruzko azken eztabaidatik. Orduz geroztik, Hezkuntza Sailaren politikak aldebakarreko erabakiak izan ditu ezaugarri, eta erabaki horiek eskaintza aldatu dute zonaldeka, bat egiteak edo xurgatzeak egin dituzte, baita ikastetxe publikoak itxi ere, beharrezkoa den lekuetan sare publikoa zabaltzeko estrategiarik gabe. Sistematikoki, Sailak uko egin dio gizartearen eskariari erantzungo dioten eta eskola publikoa indartuko duten hezkuntza-premiei buruzko benetako eztabaida zuzentzeari. Gure ustez, ezin da eskola-mapan aldaketarik egin inplikatutako hezkuntza-komunitateekin eta EHIGE eta gurasoen federazioak, HEIZE eta sindikatuak bezalako gizarte-eragileekin aldez aurreko kontsultarik eta adostasunik gabe.

Ez dira unean uneko erabakiak, ezta kasu isolatuak ere. Azken urteotan, itxituren, integrazioen eta xurgapenen prozesu iraunkor bat ikusi dugu, lurralde osoari eragiten diona. Prozesu hori gardentasun faltak, elkarrizketarik ezak eta hezkuntza-komunitateen benetako parte-hartzerik ezak markatzen dute.

Parte hartzen dugun berme-batzordeek ere – ikastetxe publikoetan eta itunpeko ikastetxe pribatuetan ikasleak onartzeko prozesua gainbegiratzea eta araudia betetzen dela bermatzea dute eginkizun – ez dute Sailaren asmoen berri jaso. Aurreko ikasturtean bezala, sailburuaren prentsaurrekoen bidez izan da erabaki guztien berri.

Berriro diogu erabaki horiek ez direla adostu, eta kasu gehienetan, erabakia irmoa izan denean jakinarazi zaiela eskola-komunitateei, eztabaidarako eta alternatibak eraikitzeko tarterik gabe. Era berean, ez da argitu ikastetxe hartzaileei (Gabriel Aresti eta Gallego Gorria Bilbon, Artaza-Pinueta Leioan eta San Ignacio Getxon) kontsulta egin zaien, ezta ikasle berriak baldintza egokietan hartzeko behar diren giza baliabideak eta baliabide materialak izango dituzten ere.

“Integrazioen” eufemismoaren pean, askotan ezkutuko itxierak gertatzen ari dira. Estrategia ezaguna da: hainbat ikasturtetan matrikula egitea galarazten da, ikastetxearen bideragarritasuna pixkanaka murrizteko eta, azkenik, desagertzea justifikatzeko. Ikasleei beste ikastetxe publiko batean matrikulatzeko lehentasuna ematen bazaie ere, sortutako baldintzek (distantziak, garraiorik eza edo ziurgabetasuna) familia asko zeharka bultzatzen dituzte itunpeko sarera.

Egoera horren aurrean, galderak saihestezinak dira: zeintzuk izango dira hurrengoak?, zein beste neurri aurreikusten dira?, ikastetxe publikoetan bakarrik hartuko dira neurriak?, jaiotza-tasaren jaitsierak sare publikoari bakarrik eragiten al dio?

Eskola publikoa ahultzen ari den bitartean, itunpeko sarearen finantzaketa handitzen ari da. Ez gaude berrantolaketa neutro baten aurrean, baizik eta eskola publikoaren desegite progresibo baten aurrean, gardentasunik eta eztabaida sozial zintzorik gabe gauzatua. Eskola publikoa defendatzea ekitatearen eta gizarte-kohesioaren aldeko apustua da; horregatik, eztabaida hori ezin da ateak itxita egiten jarraitu.

La entrada Eskola mapa berrantolatzea aurrera doa, gardentasunik eta parte-hartzerik gabe se publicó primero en Ehige.

Bermeoko Herri Eskolak patio berria aurkeztu du, inklusioa, jolasa eta ongizatea ardatz

Bige — Wed, 28 Jan 2026 11:08:25 +0000

Bermeoko Herri Eskolak inklusioa, jolasa eta ongizatea ardatz dituen patio berritua aurkeztu du. Helburu nagusia gaur egungo ikasle eta familien beharrei erantzutea eta eskolako espazioa komunitate-gune bihurtzea izan da.

Urtarrilaren 16an egin zen inaugurazioa. Bertan azaldu zutenez, hobekuntza hau ez da obra isolatu bat, baizik eta parte hartze prozesu baten emaitza: udal aurrekontu parte hartzaileen bidez onartutako proiektu bati esker egindakoa, udalaren eta eskolako komunitatearen lankidetzarekin.

HELBURUAK ETA EZAUGARRIAK

Jolasa eta hezkuntza elkartuta. Jolastokia diseinatu da ikasleen garapen inklusibo eta parekideari bultzada emateko, non bai jolasa bai ikaskuntza espazio bezala bizitzen diren.

Inklusioa eta ongizatea. Espazioaren antolaketa eta elementuek inklusioa eta ongizatea bultzatzen dituzte, ikasle, irakasle eta familiek espazio komun hori elkarrekin bizitzeko eta aberasteko.

Komunitate-proiektu bat. Patioaren egitasmoa udalarekin, ikastetxeko zuzendaritzarekin eta Uharte Lehortua guraso elkartearekin batera landu da. Gainera horrelako proiektu parte hartzaileek eskolaren eta herriaren arteko harremana indartu dutela adierazi dute.

Bermeoko Udaleko ordezkariek nabarmendu dute kirol eta hezkuntza arloko gune honek ez duela soilik ezaugarri fisiko berritu bat; proiektu pedagogiko eta komunitario baten adierazlea dela. Horrela, eskolako patioa ez da bakarrik jolasean erabiliko den lekua, baizik eta ikasketa, harremanak eta bizikidetza lantzeko espazio ere izango dela.

Instagrameko bideo honetan ikus daiteke patio berriaren jolas giroa eta funtzionamendua: https://www.instagram.com/reel/DTlf9a3Dh1Q/?igsh=MTVpaGJ4bGJvd2sxYQ==

La entrada Bermeoko Herri Eskolak patio berria aurkeztu du, inklusioa, jolasa eta ongizatea ardatz se publicó primero en Ehige.